立法會新一屆主席，代表工業界（一）的梁君彥在一片混亂之下，以三十八票獲選。這位新主席，口裡說愛國愛港，在當選前一直不肯放棄英國護照，疑點重重，非建制一定咬住唔放。如此厚顏，卻依然獲得中聯辦欽點，亦令其他建制派議員情何以堪；梁君彥面對兩面不是人的局面。 與梁君彥相識十多年的前立法會議員田北俊接受本刊訪問，亦狠批這位前黨友能力有限。田北俊指他脾氣火爆，擔心他未來四年會被激到嘔血兼爆血管。他告誡別以為做主席好巴閉，更呼籲他：「做好盤生意先啦。」 梁君彥一直以建制派自居，今次參選立法會主席，去到最後一刻才入紙放棄英國國籍，疑點重重，不單非建制派要追究，連建制中人亦不滿，田北俊說：「我好詫異，你又做全國政協，又做立法會內會主席，高度標榜自己係忠實嘅愛國愛港人士，超級保皇黨，你攞住個英國護照喺度呃香港人。北京領導睇到呢單新聞，都有人問，好多傳統左派都有呢個質疑。如果唔係選了立法會主席，你繼續攞住英國護照？原來你對香港都冇信心，隨時可以走佬。」 梁君彥甫上任已問題多多。同是工業總會及前自由黨戰友、與梁君彥相識十多年的田北俊，認為作為回歸後第三個立法會主席，以梁君彥的辦事能力，絕對做不到曾鈺成，也比不上范徐麗泰，因為他脾氣火爆，與非建制關係惡劣，即使梁已承諾會改善溝通，他亦「唔睇好」，「你仲係新議員呀？過去做內會主席、代主席，你同泛民乜關係？你問吓自己啦。一把年紀，江山易改，本性難移，搞到自己嘔血，容乜易走咗去『上高』，唔係咒佢，爆血管咪搵嚟搞。」 田北俊認為未來一屆流會次數將破紀錄。「泛民下下同佢開片點人數，建制四十一個人，主席以外要有三十四個人坐定定開會，保皇黨會好辛苦囉。」他指上週選主席當日，其實只有三十八票支持梁君彥當選，「即係有幾個人唔撐梁君彥㗎，呢三十八個只要有四個唔開會就流會。」 其他建制派中，最少有兩名議員曾高調表示有意擔任主席，最後梁君彥在西環的欽點下，各路人馬都要讓路。然而田北俊認為其他人選都比梁君彥好，「廖長江，中總代表，同泛民關係絕對比梁君彥好。如果他做大會主席，同泛民有傾有講，佢無做過代主席，但大律師對議事規則是很易上手，我覺得他絕對比梁君彥勝任。謝偉俊一樣係律師，而且唔係下下敵我分明，都會撐吓泛民。」他指與謝偉俊一樣是直選的田北辰，有民意授權，但：「為了田北辰身體健康，細佬你都係唔好做了。」 田北俊認為梁即使熟讀議事規程，卻難駕馭大事件，他觀察到：「當有大事發生，曾鈺成就會坐番喺位，曾鈺成去食飯、去廁所先叫梁君彥坐上去。佢做內會主席，我見到佢同泛民關係惡劣，點駕馭？」梁君彥過去主持會議，屢次欲在重要議題上「剪布」，作風強硬。一四年，吳亮星強行通過新界東北撥款，激起眾怒。毛孟靜後來於內會要求討論表決的有效性和譴責吳亮星，梁君彥以「無官員回應」為由拒絕討論，公然包庇盟友。今年初立法會審議「版權條例」，泛民拉布，有次梁國雄要求點人數，黨友石禮謙及陳健波在會議廳兩道大門中間講電話，未有回席，但代主席梁君彥堅持計及兩人，被長毛力斥濫權。 然而，田指出西環就是期望梁君彥能強硬剪布。而梁君彥與泛民關係惡劣，田北俊預視未來四年立法會，勢將癱瘓。

Subscribe

#立法會 #立法會主席 #拉布 #中聯辦 #內會主席 #梁君彥 #高永文 #選舉主任 #自決 #港獨 #港獨違法 #廖長江 #田北俊 #建制派 #保皇黨 #曾鈺成 #范徐麗泰 #泛民 #自由黨 #全國政協 #英國護照 #英國國籍 #東北撥款 #吳亮星 #石禮謙 #謝偉俊 #議事規程 #立法會議員 #梁振英 #DQ #梁天琦 #黃台仰 #游蕙禎 #梁頌恆

source