【上主偏心窮乏困苦的人】
上個主日911 ，我哋講咗上主也會後悔、回轉，如果人有呢種心懷，人就與上主分享着同一個心，只有絕對權力的人不會回轉。絕對權力叫我哋知錯，叫我哋內疚，叫我哋認罪，叫我哋坐監，錯嘅係我哋，依法合法永遠偉大光明，只有佢哋係正確嘅。我大外甥女16歲，喺美國出世，佢問我一個身份認同嘅問題。佢話同爺爺討論自己係美國人定係中國人，應該用一支咩旗放喺社交媒體上？佢爺爺答佢幾十年前由大陸走難去美國，自己嘅過去，祖先都係大陸，所以自己係中國人，佢爺爺呢個答法係好典型嘅想法同身份認同，除咗歷史經驗之外，似乎在沒有其他。其實，100個人可能會有100個身份認同的方法與道路，你睇嗰個金牌奧運得主谷乜乜，佢嘅身份認同就相當動態，佢嘅身份認同方法就係「人民幣」同「美金」，佢呢啲例子，大家見唔少。不過更多嘅人，會選擇以嗰個地方嘅文化、氣氛和價值觀的來認同自己嘅身份。如果上個主日講的回轉、悔疚，也可以用在身份認同方面的話，人人都可以不認同某個國家的價值觀、人人都可以對某個民族的文化感到好羞恥，因而不認同嗰個國家民族嘅標籤。
人，真的需要一個這樣的身份認同嗎？我沒有用這個角度回答我外甥女，我同佢講：你係你媽媽嘅女、細妹嘅姐姐、爺爺嫲嫲嘅孫、爸爸嘅寶貝，亦都係阿符(外甥女對我嘅暱稱，即係舅父）係冤獄中嘅支持同安慰，國家身份認同，係唔需要嘅。基督信仰要求我哋嘅，唔係站喺身份認同上，基督信仰要求我哋嘅，喺站喺貧乏同被欺壓的人嘅身邊，與佢哋認同，因為上主就在他們當中。
天主教有所謂神貧的教導，基督新教比較少呢啲，今日舊約聖經阿摩司書8章4至7節，係為貧窮人、受欺壓的人喊出正義的呼聲，佢直斥嗰啲富人、政治上的既得利益者係「吞吃困乏人，使困苦人衰敗的」、「用狡詐的天平欺哄人」。狡詐的天平，今日香港都好多，呃稱嘅不在話下，不公平不公義在制度上對付異見人士、冇權者的，大家都見唔少聽唔少。阿摩司書8章 6節講，呢啲人「用一雙鞋換窮乏人」，人命何價？何等的賤？動輒判人坐幾年冤獄，時間就是人命，就是生命。用幾句說話作為判詞，只要係愛國嘅，即使持刀傷人都係情操高尚，只要係愛國嘅醉駕撞人都冇事。然而，異見人士，開街站、畫漫畫已經又拉又鎖又坐監，仲要人格污蔑、道德謀殺。有絕對權力同權勢嘅人，就可以肆無忌憚咁作出擦鞋式嘅政治表態，但又隱身喺所謂「法治」的偽中立之內。先知阿摩司就係痛斥，呢一啲人渣、呢啲制度，係「貪吃窮乏人的，使貧苦人衰敗」的，呢啲就係「賣出用小升斗， 收銀用大戥子」。3000年前的先知批判，今日香港人也承擔着、接觸到，但仍有人發出先知的呼喊呀？矗立在舊終審法院上的正義女神，究竟比乜嘢矇住眼？佢手上嘅天平，已經成為「賣出用小升斗， 收銀用大戥子」，欺哄人的狡詐天平，佢，亦都成為咗政權嘅木偶？條線任佢劃、劇本任佢寫，你哋體會到我嘅憤怒和悲傷嗎？
又講返樞機被捕，有條友、梗係有公權力嘅友仔啦，佢話，唔可以因為佢係主教，就唔拉佢，咁樣違背教廷梵蒂岡所說嘅公義！天主教嘅公義，被扭曲，變身政治打壓嘅工具，而且政治的打壓，是隱藏在不關乎政治的所謂法治背後的，有冇人看出這種謬誤？呢種謬誤，我會好串咁回應：「係呀，神職人員應該殉道添，好似羅馬暴政釘死耶穌咁！」串返轉頭！當然，主教同弟兄姊妹溫文爾雅，唔似我呢啲市井之徒，會串爆人渣！
今日第2段嘅經文，係新約聖經提摩太前書2章1至7節，聖保羅命不久矣，快被斬首，佢寫信比佢所愛嘅教會領袖提摩太，叫佢為統治者祈禱。我就冇咁好氣啦，我都祈禱，但我嘅祈禱係佢哋全家一齊快啲去天堂吧！其實為統治者祈禱，聖保羅都冇話祈禱佢「長治久安，由治及興」咁嘅說話，信徒為統治者祈禱，使信徒們可以「敬虔端正，平安無事度日」，各位要知道，那是暴政迫害教會的時代，那是信徒被釘十字架、被斬首、被送入羅馬鬥獸場的時代，那是殉道的時代，我哋為那些政權祈禱，是使我們、使教會可以「平安無事度日」啊！大佬啊，如果當時，其實而家都係，如果有「平安無事度日」嘅話，又使乜講呢句呢？你地覺得係唔係呢？
教會唔係政黨，唔係政治團體，當然只係公民社會一員，嗰啲唔想批評政權嘅人會話「政教分離」，等於「學校唔應該政治化」一樣偽善，對不公義不表態，亦都係一種政治表態，「政教分離」嘅意思係教會權力與政治公權力不混雜，我們要理解這一點，面對唔公義嘅暴政閉口不言，這是一種支持暴政的政治表態，十分清楚。感謝上主在歷史上呼召先知為世界呼喊，天主教梵蒂岡第二次大公會議， 1960年代舉行，會議上講「信徒不一定有一切問題的答案，但這並不表示他們不可以提出問題，關注問題。」信徒要知道我們獨特的貢獻，是以福音精神使社會更好、更公平公正公義。
今日我哋又睇路加福音16章1至13節，叫我哋效法嗰位聰明嘅管家，用所謂「不義」之財結交朋友，到自己窮途末路時，有人會收留我哋，猶太人是精明的群眾，生財有道，這個很多人都知道，耶穌就是用這個猶太人傳統故事，去講佢嘅福音。故事講一個聰明嘅管家知道主人搵佢算帳，要辭退佢，佢趁仲有時間，就叫晒啲欠佢老細錢嘅債仔嚟，明明欠$100嘅，佢半價，有啲打八折。主人反而稱讚呢位「不義」嘅管家，冇怪責佢不特止，仲話佢好嘢、叻仔。點解叻仔呢？因為佢把握到重點。弟兄姊妹，重點唔係身外物嘅錢財啊， （當然啦嗰個係主人嘅錢，主人有大把，自己慷他人之慨）我哋嘅錢財亦都唔係我哋嘅錢呀？共同富裕咪就係呢一種視野囉，街外錢大家搵、大家洗。你自己唔需要而別人需要錢財，如果你堅持不捨，就成了「不義之財」了，這是福音對錢財的定義。善財難捨，冤枉甘心，你睇吓今日嘅政府，財富如何分配呢？回水係會消費券，點解唔係人人回水現金呢？我以前嘅政黨，一路都嗌緊人人回水，大班到最後被感動，支持回水。政府財政分配方式，亦係政治權利嘅不平等，亦都造成不同結果和政策，民主、政治、民生、宗教、倫理，這一切都是糾纏不清的，但教會權力與政治公權力不相混雜，這是政教分離的真正意思，而不是說教會不批評不公義政治的意思， OK ？
在正常的民主公義社會，教會不只做慈善工作，也為人，特別為窮人、弱勢嘅人爭取權益。除咗有得投票嗰千幾個人之外，絕大部份嘅香港人，都係政治權利上嘅窮人、可憐蟲，一旦政治權利上不平等，其實所謂的民生、所謂的經濟平等，也是遙不可及的。所以那些說「香港好啊，仲有經濟仲有錢搵，政治民主新聞言論自由，什麼公義那些，不要也罷！」這是愚不可及，並不知道所謂人性尊嚴的人，教會也要用福音啟迪這些人的民智，並甦醒這些人的心。教會為人爭取權利，並維護人的尊嚴，人的尊嚴絕對比財富錢財重要得多。
耶穌喺路加福音16章13節講：「不能同時事奉天主又事奉錢財。」我哋記得耶穌反擊魔鬼第一個試探，叫佢將「石頭變麵包」時候，佢話：「人活着不是單靠食物，乃是靠上主口裏的話」異曲同工，同出一轍。我哋嘅人生係為咗人嘅尊嚴，永恆嘅價值而奮鬥並獻上自己、燃燒自己嗎？幾年前街上充滿咗呢啲人，而呢啲人，仍然喺冤獄中燃燒自己嘅生命，我哋冇虛渡，沒有白過呢啲以年計嘅日子，逼迫仍然繼續，社會依然荒誕扭曲，但被選上的人，被人的尊嚴和真理呼召的人，一直彼此守望，喺扭曲悖謬、顛倒是非的世代，彼此相認，互相紀念，香港人互相加油，事奉上主。願榮耀歸上主榮光歸香港。誠心所願。
source