//35+案1129繼續喺西九龍公演
後生仔小朋友關心野豬安危，其志可嘉//

1）今日係快必兩位神學院同學神同大曹同小T結伴探訪。佢哋8:45到達，做完登記隨即入去探訪等候室，好快啊，今日9:15就已經聽到叫Number，快必今日係喺3號窗，距離照鏡位遠咗少少，但都唔影響佢姿整嘅心情；

2)兩位神同有時都會同快必happy hour, 拎起電話，快必話尋晚dinner, 食咗燒味同生炒牛肉飯，仲有冰凍啤酒呀，冇酒精嘅，不過都係爽呀！今朝佢就食返素啦，佢話盡量唔食咁多肉，平衡下啦，今日早餐係有辣油嘅炒麵，白果腐竹白粥，清清地又一餐；

3）快必話船艙入面已經收到消息， 11月29號35+案呢齣劇會繼續喺西九龍法院上演，不過相信都只係循例過堂，跟住就會搬去另一個劇院—— 高院演出。至於會唔會有人辭演，即係認罪；又或者有人可以引退唔使再演，即係唔會俾人告；又或者有新進演員加入？快必話大家唔使一定要入場觀賞，但係就一定要密切留意呢齣戲嘅發展，雖然唔精彩，但都要share比全世界嘅朋友知道喎；

4）就嚟聖誕節，快必之前就叫家人幫佢入10張聖誕咭，原來佢話搭lift嘅時候，喺lift口嘅大堂告示板，出咗張告示，(好Old School，好似中學咁)話俾船員聽，聖誕節佢哋可以入10個聖誕咭信封同郵票，舊年佢就冇入過啦，今年試吓喎，仲話要諗吓寫啲乜嘢寄俾大家；

5）提到聖誕節，快必同神同話世人大概都被商業化嘅社會、商場化嘅淺薄洗咗腦，以為聖誕節係和諧平安、溫馨溫暖，佢就笑自己專唱反調，教壞人、煽動人、啟迪人，因為佢講真話吖嘛，聖誕根本就係不安，係暴政殺害所有新生嬰兒，因為暴君認為所有新來嘅生命同希望，都係威脅佢哋代表嘅舊有勢力…

6）10月尾有個中同嘅囡囡去探快必，中同囡囡已經大學畢業出嚟做嘢，快必話睇見一代過去一代又來，新世代有新生命新希望，開展新嘅可能性，佢嘅心亦都好激動，唔知當時呢位少女係唔係感受到佢嗰種欣慰和激動呢？(快必又講耶穌啦)快必話路加福音2章25至35節，兩個老先知見到嬰孩，作為一個新生命的耶穌，即救恩和公義和平之降臨，兩個先知嘅欣慰，就好似佢見到中同嘅囡囡一樣咁感動；

7）另外，快必又話睇新聞知道有幾名獸醫學生、又有九歲小朋友都關心野豬安危，發起聯署，又寫信俾漁護處同777，呢啲後生仔同小朋友，其志可嘉，雖然都估到政府會點答，但盡力一試，明知不可為以為知，也令人感動；快必都好關心野豬，睇到政府完全唔聽民意，可能因為野豬撞親差佬啦，所以視為危害國家安全囉；

8）上星期快必嘅郵箱收到好多信，唔少得嘅銀髪婆婆、Angela、黃金野豬、香港師奶、亞T、Emiya, May Kong、竹青、Jacqueline CHAN, 馮慧、煲湯媽媽、Koyuki，ES, Rebecca , Kenneth Fu, angel angel…已經將你哋嘅信轉寄入去荔枝角俾快必，希望佢盡快收到啦，多謝晒你哋一路都記掛住快必，同佢做筆友：有寄上流戰爭劇情介紹、有share黃明志嘅簡譜，有介紹梅艷芳電影又或者英國71歲阿伯同兩隻狗狗嘅故事⋯⋯感動感激感恩；

9）不厭其煩咁同大家講，希望大家有時間嘅話，多啲寫信比快必，陪伴佢船上每一日。如果你哋想寄聖誕咭俾快必，或者其他政治犯手足，千祈唔好買啲有閃粉、貼紙、立體嗰啲喎。未買到聖誕卡嘅可以寫住信同快必傾吓計先，因每次收到大家嘅來信，佢就同有得飲啤酒一樣咁開心；所以請大家唔好停，繼續寫信比快必，來信請寄去：

香港七姊妹郵政局
郵政信箱60141號
（PO Box 60141
Tsat Tsz Mui Post Office, HK）

大家想寫比斯叔嘅話，亦都可以寄去呢個地址。

10）最後，繼續宣傳一下快必嘅Patreon ，希望得到大家點點滴滴嘅支持，應付漫長嘅訴訟。未加入嘅朋友就快啲加入，加入咗嘅就多啲share出去，走失嘅朋友，就盡快加入返啦。唔好唔記得仲有赤柱嘅斯叔，佢嘅Patreon 都需要你哋支持㗎，多謝晒。

成為 YouTube 會員：
支持人力 | 轉數快：(FPS ID) 8986663、(電郵) peoplepowerhk@gmail.com、(電話) +852 63964111 | (支票抬頭 PEOPLE POWER) 滙豐銀行 499-747327-001 東亞銀行 015-514-10-404755-4
PayMe：

🤗Facebook：fb.me/peoplespower
☎️MeWe：mewe.com/p/peoplepower
🎥YouTube：YouTube.com/c/PeoplePower
🐦Twitter：twitter.com/PeoplePowerHK
📷IG：instagram.com/PeoplePowerHK

source