大家好, 我係蕭德良, 我宣佈參選2022年香港特別行政區 行政長官選舉!
呢幾年, 香港局勢變化之大, 應該無人會樂見, 我係一個政治新鮮人, 你唔會見到我出席政治集會, 即使建制或民主集會, 我都冇出席, 我最大特色就係少談政治, 只談民生. 當然, 依一個係一個弱點, 因為我 無既得利益者支持, 而市民亦唔認識我, 但呢一點, 亦可以係一個強項, 我唔會有政治包袱, 我唔需要偏袒任何一方, 我唔需要利益輸送, 我只會為, 我生活嘅地方謀取最大成就.
我參選嘅策略係乜野呢? 我係一個和平嘅人, 我希望香港可以安定繁榮, 我嘅信仰係以禪悟道, 往後整個管治都會有呢兩個信仰特色! 同以往選舉一樣, 我都有一個口號, 我個口號係”成長”, 我希望香港同香港人經過左呢幾年變化, 可以得到成長.
我會分3個階段,
第一階段自然係拎到 188票, 我資源好少, 希望可以有義工, 幫忙做聯絡工作, 或選委可直接聯絡我, 我係呢個階段主要係同選委達成協議, 佢哋希望特首可以為社會做乜野, 我都會記錄及嘗試回答係唔係做到, 呢個階段我唔會有太多個人立場, 或者可以講我立場就係中立, 科學就係我立場.
第二階段係當可以同其他候選人一齊比較, 呢個時候, 我會俾大家見到我嘅政綱, 比大家去評審邊個理念先係對香港最好, 邊個可以帶領香港人成長, 邊個方法可令香港向中國或世界有所貢獻.
第三階段當然係成為特首之後, 點樣令到香港係世界爭一席位.
對於暫時無政綱嘅我第一步係點行呢? 如果我做到特首, 我希望盡快回復香港係國際上嘅安穩, 黎一次和解, 先承諾為之前判刑嘅政治犯求情, 希望佢地得到減刑, 呢幾年香港法律得到完善, 但同時, 對香港人黎講的確係一個大轉變, 香港人需要時間去適應, 如果有人講完善唔需要時間適應, 相信只係度講大話唔現實, 唔理解市民嘅需要! 一啲只係帶住膠帶或雷射捧而無實質破壞嘅人, 我希望可以得到以教育為主要嘅刑罰, 而唔係傷害刑罰, 另外我希望增加遞解出境係國安法刑罰入面, 如果有人唔同意由中國管理香港, 我覺得可以遞解佢出境, 佢可以去佢心目中最好嘅地方, 而香港亦唔需要多付呢一類刑罰成本.
至於我會點樣管冶香港呢, 我覺得係香港呢一個地方, 生活咗好多不同種族嘅人, 而非單一中國人, 管冶相對需要高度智慧, 而我希望不單只有我擁有呢個智慧. 我更希望帶到呢個智慧俾其他人, 令香港人可以一齊去建立一個好嘅管冶環境, 增長整個香港競爭能力, 令香港成為一個令人響往來學習及生活嘅地方.
可能會有人問, 點解我會覺得可以提升其他人智慧, 大家應該見到而家人工智能對社會影響, 我由學電腦到而家40年, 對智慧都有一定程度研究, 我會以身作則, 再加以補述, 從而增加香港人思維方法.
其實我第一次覺得要研究智慧問題嘅時侯, 係睇到一本書, 90年時有一本書叫”牛頓雜誌”, 係第88期入面有一篇”發明家與發現者”文章, 文中提到有記者, 拎住愛迪生所寫嘅智能測驗俾愛因斯坦去做, 而愛因斯坦講唔識做, 到結尾作者一句”可理解而不可認同”, 就啟發我提升智慧興趣, 之後仲有好多單獨事件, 包括學禪同道, 理解哲學及科學精神, 都幫助我去加深理解智慧呢一樣野~
等一陣我會先講二個思維方式, 增加大家對現實的理解, 希望加深一般人對現實認知.
對於而家好多人關心嘅問題, 就係我係咪中國人, 我愛唔愛國, 呢個問題其實好針對性, 我係香港出世, 如果冇錯應該係李寶椿健康院, 97年前我嘅護照寫我係英國屬土公民BDTC, 我唔知點解有政客講佢成世都係中國人, 冇其他國家國籍, 我只係一個小市民, 97前我無方法拎其他護照, 包括CI, 而97後, 我亦只申請香港特區護照.
如以護照計, 97前我係英國籍, 97後我係中國籍, 但我鄉下係廣東省, 我只識廣東話, 英文我唔得, 普通話我亦唔好, 而廣東同香港都係中國一部份, 所以我係中國人, 呢一點應該係無可置疑. 我對祖國其實認識唔深, 我希望做咗特首後可以加深認識, 不過我一定係以香港人生活得好為前題, 呢點相信一個有頭腦嘅人都會明白同認同. 正所謂香港好, 即係國家好!
假如我做唔成特首, 我會做乜呢? 其實我一直打算去外國見識, 嘅然我貢獻唔到係呢個地方, 咁相信我一定有所不足, 咁不如出去見識多啲, 可以嘗試不同嘅嘢, 或者可能會幫助一下想出外見識嘅人, 如果我有機會去讀書, 或者以諾貝爾獎為目標, 積極進發都未定架(笑)~
好, 我而家先講一下另一種思考方法~
第一個我要講嘅係, 1個蘋果加1個蘋果答案係乜野, 係小學上嘅教學, 1+1=2, 1個蘋果加1個蘋果, 自然就係2個蘋果, 一般人所覺得嘅現實就係咁樣. 但真正嘅實, 如果純粹只係”1個蘋果加1個蘋果”, 係無辦法計出黎. 點解咁講? 簡單原因就係因為整個世界無一樣實物係”一模一樣”, 點解我地可以接受1個蘋果加1個蘋果就係等於2個蘋果, 因為我地有”共識”, 我地共識蘋果係點樣, 不論青色, 紅色, 甚至係爛, 我地都接受佢係一個蘋果, 但古代人提出”白馬非馬”, 其實就係提出, 唔係每個人都會”共識”所有事物, 所以當1個蘋果加1個蘋果時, 我地首先要知道點樣去共識”蘋果”呢個事物, 之後先可再進行運算, 如果無”共識”, 現實中, 其實係無可能計算”1個蘋果加1個蘋果”呢一個咁簡單嘅問題.
另一個就係拋銀仔問題, 究竟現實中, 公字出現機率係幾多, 中學數學教嘅答案, 都會係50%, 但現實中其實係無50%呢樣野, 所有未來發生事物都係 100% 或 0%. 咁50%係乜野呢? 50%其實唔係事情出現機率, 而係”我地對於事情所知道嘅比率有幾多”, 每個人都可以唔同, 比如A君可能只會知道拋銀仔有公或字出現, 所以佢對於拋銀仔認知, 就係50%, 而B君覺得有”邊邊”可能會出現, 所以對於出現”公字呢個事情”認知少於50%, 但接近50%, 而C君有能力用手法決定拋銀仔所出現嘅公字, 所以C君對於”出現公字呢個事情”, 佢認知係100%, 每個人都會對同一事情有不同認知程度. 但重點係現實之中, 所有事情出現機率都只有”出現” 同 “唔出現”, 即係100%同0%兩個.
可能會有人認為我玩緊文字遊戲, 而唔係現實, 亦好似冇乜用, 呢個睇你開唔開放去接受現實, 簡單講, 如果明白第一條思考方式, 就會明白點解好多政客做訪問時會以為自己已經答咗記者, 但記者唔知或唔明, 其實就係因為雙方冇一個”共識”, 我見現今世界, 包括政客同記者都好似唔明”共識”呢個咁重要嘅大前題, 好多時令到整個訪問都變得無價值.
而如果明白第二條思考方式, 就會明白點解有D人唔想打疫苗, 尤其而家COVID-19, 各國都有少部份人, 都對打疫苗都存在疑問, 但政府又唔識解答, 如果明白第二點, 相信大家都可以了解數據所顯示嘅意思係乜野, 從而增加打疫苗接種率.
以上只係示範兩個好根深柢固嘅謬誤, 其實仲好多好多, 不過我會留返係我有188票, 入選之後再講, 入選之後所提出理念, 用返以前好多人所講過嘅說話, 就係可以超英趕美, 可以完美解釋絕大多數社會問題, 如果加上香港人一同努力, 一定可令香港成為世界中心. 今次影片差唔多, 太長大家都悶, 請希望香港變得更加好, 更加和平嘅人, 都支持我, 幫忙我!
不過我都要提點一下, 而家政治有好多變數, 加入幫忙或反對我嘅人都會可能會受到不同人士調查, 要承擔到呢個風險先好參與. 如果有興趣共同令香港更加好, 請用Skype 或 microsoft teams 或 wechat 聯絡我! 多謝大家~
skype/microsoft teams : siutakleung@outlook.com
WeChat ID : SIU_TakLeung
如果有人真係想睇我政綱, 其實可參考我5年前所寫!
5年前準備參選的演講
演詞全文
政綱簡要
Q&A